علاش وكيفاش.. "الفالنتين" وعلاقة المغاربة بالحب

الأربعاء 14 فبراير 2018 - 17:55

المغاربة كاملين كيهضرو هاد الأيام على عيد الحب، والاحتفال بيه، وبزاف منا غادين يشريو إما الورد أو الشكولاط باش يهديهم للناس اللي كيبغيو أولا يعرضوهم ولا يتعرضو باش يغتنمو هاد المناسبة ويحتافلو مع بعضهم، وببساطة حتا واحد ماباغي من ورا هادشي كامل غير أنو يعيش لحظات زوينة تنسيه فبؤس المشاكل اليومية اللي هو غارق فيها.

هاد "الفالنتين" كيخلق فكل سنة أجواء مميزة عند "لي كوبل" بالدرجة الأولى، وكلشي البنات كيتسناو من الأحبة ديالهم باش يقدمو ليهم هدية ولو تكون بسيطة ويعبروا ليهم على مشاعر الحب تجاههم ونفس الشي بالنسبة للشبان، وهادا باختصار مفهوم هاد المناسبة عند نسبة كبييييرة من الشباب المغاربة.

وفوسط هاد الاستعدادات وحالة الترقب إلا صح التعبير كنلقاو شي ناس اللي كيحاولو باي شكل من الأشكال يحاربو هاد العادات الاحتفالية البسيطة اللي دخلات لحياة المغاربة وباش يحققو هاد المبتغى كيبقاو يدخلو الدين باش يبينوا أنهم على صواب، ويقولو باللي الاحتفال حرام، وبأن فيه تقليد للكفار وأن هادشي غادي يطمس الهوية ديال الشعب المغربي، وكيحاولوا يخلقوا عند الشباب هاداك الإحساس بتأنيب الضمير.

ولكن على الرغم من ذلك، ولاو بزاف ديال الشباب كيحتافلو سنويا بهاد المناسبة، وكيهدييو لبعضياتهم الورد والشوكولا وغيرها من الهدايا اللي كتنعش تجارة بعض المحلات التجارية المتخصصة، وكتهرس الروتين ديال الحياة ولو بشكل بسيط.

ومابين اللي كيحتافلو واللي ماكيحتافلو وكيعتابرو أن هاد الأمر بدعة كيكون كل عام بزاف ديال القيل والقال فالموضوع...وبزاف ديال الناس كيطرحو السؤال واش إلا احتافلنا بوردة أو هدية ورسمنا الابتسامة على وجه الشخص اللي كنحبوه حرام وكنرتاكبو معصية؟ ولا راهم كاينين شي ناس اللي ماعندهم حتا خدمة فهاد الحياة من غير أنهم يحرمو كلشي وكتلقاهم فحياتهم الخاصة بعيدين كل البعد على هادشي اللي تيقولو؟