- 08:30عاصفة ثلجية تحاصر المسافرين بين مراكش وورزازات
- 08:02نارسا توصي بتوخي الحذر
- 07:05ساو تومي وبرينسيب تُجدّد دعم مغربية الصحراء
- 06:30توقعات أرصاد المغرب لطقس الجمعة 31 يناير
- 21:40انوار صبري...لا أريد أن أقول حفل الختام في حضرت الوزيرة عمور
- 21:37عمور تتكلم خلال فعاليات لي امبريال عن كأس العالم و مغرب المستقبل
- 21:18 البطولة الاحترافية...نهضة بركان يهزم الجيش الملكي ويبتعد في الصدارة
- 20:43لم ينج أحد.. 67 قتيلا في حادث تصادم طائرتين بأمريكا
- 20:13نقابة تطالب بتوسيع حق الإضراب وتقليص آجاله وحذف الاقتطاع
تابعونا على فيسبوك
علاش وكيفاش ...صلاح الدين مزوار من السياسة إلى رئاسة "الباطرونا"
شكل انتخاب رئيس جديد للاتحاد العام لمقاولات المغرب حدث مهم بالنسبة للمقاولين المغاربة، اللي حضرو بكثافة لأحد فنادق البيضاء باش يختارو الرئيس الجديد اللي غادي يخلف مريم بنصالح.
الجمع العام اللي دام لساعات طويلة وتعرض فيه التقرير الأدبي والمالي ديال مريم بنصالح واللي تم التصويت عليه بالإجماع، شكل مناسبة لمريم بنصالح اللي كانت جد متأثرة لحظة وداعها لمنصب رئيسة الاتحاد على مدى ولايتين، للثناء على كل الأشخاص اللي كان كيشتغلو معها، وطلبت المعذرة منهم لأنها كانت دائما مهووسة بالتدقيق في التفاصيل الصغيرة، كما أن مجموعة منهم عبروا عن شكرهم ليها على كل الإنجازات اللي حققها الاتحاد فولايتيها وأكدوا أنها امرأة مميزة، وترأست الاتحاد بحزم وتفان.
ومن بعد أزيد من ساعة اللي منحها المنظمون للمنخرطين للتصويت تم الكشف عن النتائج اللي بينت أن 5173 مقاولا مغربيا اختاروا صلاح الدين مزوار لقيادة سفينة الاتحاد فالمقابل حصل المنافس ديالو حكيم المراكشي على 1432 صوت، وبهاد النتيجة كان الفائز هو صلاح الدين مزوار وفيصل مكوار.
كانت لحظة الإعلان عن النتائج حاسمة، وفالكلمة اللي لقاها مزوار قال باللي مجموعة من الناس مكانوش متافقين مع فكرة ترشحو لهاد المنصب وأنهم بينوا ليه أنه يمكن يخسر أكثر مما يمكن يربح من هاد الخطوة، ولكن هو كان عندو تصور خاص وبما أنو ابن المقاولة المغربية وعارف بخباياها فكان لابد ليه يدخل لهاد المنافسة لأنه عندو مجموعة من الأهداف اللي باغي يحققها على رأس الاتحاد.
وجا فالبرنامج اللي وضعو مزوار لقيادة الاتحاد أن باغي يركز اهتمامو بشكل كبير على المقاولات الصغيرة والمتوسطة اللي كتتعرف ب"ستارتاب"، أنه غادي يحاول يلقا حلول لمجموع العراقيل اللي كتعتارض طريقها منذ التأسيس وعلى رأسها صعوبات التمويل.
ووعد المقاولين بأنه غادي يدير كل ما فجهدو باش يعزز علاقات التعاون مع الحكومة بهدف القطاع الخاص، على اعتبار أنو من ركائز التنمية لأنه قادر على امتصاص بطالة الشباب المغربي، وزاد قال إنه باللي هو غادي يعمل على وضع تصور متكامل باش يرصد من خلالو الإجراءات اللي غادي تخول ليه إلى جانب أعضاء الاتحاد تحفيز الاستثمارات المحلية لأنه غادي يكون عندها تأثير إيجابي واضح على التنمية بجميع أقاليم المملكة.
ومن بين أقوى النقاط فبرنامج صلاح الدين مزوار أنه وعد باللي غادي يدخل عدد من المقترحات على مشروع قانون مالية 2019 واللي كتصب فاتجاه منح المقاولات التكنولوجية الناشئة إمكانية الاستفادة من جميع الإجراءات القانونية اللي كتخول ليها انها تتطور بسرعة.
ومن بعد هاد البرنامج الغني اللي مكن مزوار من ترؤس الاتحاد العام لمقاولات المغرب بين الرجل على استعدادو الكامل على الدفع بالاتحاد إلى الأمام وإعطاءه نفس جديد، وهو الأمر اللي خلا العديد من المقاولين يستبشرو خيرا بهاد الخطوة ويعبرو عن متمنياتهم باش يكون الاختيار ديالهم للرجل في محله.
وفهاد السياق، عبر مجموعة من المقاولين اللي عطاو صوتهم لمزوار فتصريحات لـ "ولو.بريس" عن كونهم عاقدين أمل كبير على التزام مزوار بالبرنامج اللي قدمو واللي قنعهم بيه حتا عطاوه الأصوات ديالهمن وأنهم حاليا مدركين باللي خاصهم يعطيوه شوية ديال الوقت باش يقدر يضخ نفس جديد فالاتحاد.
وهكذا طويت صفحة مريم بنصالح المليئة بالإنجازات لتتلوها صفحة جديدة عنوانها صلاح الدين مزوار رجل المهمات الصعبة الذي سبق له أن شغل منصب وزير للخارجية والأمين العام لحزب التجمع الوطني للأحرار، بالإضافة إلى الأدوار الطلائعية التي لعبها في كوب 22.
وفي انتظار ما سيأتي به القادم من الأيام يبقى السؤال الجوهري الذي يطرحه غالبية المقاولين هو من أين سيبدأ مزوار برنامجه؟ وهل سيتمكن من تحقيق إنجازات كبرى تنضاف لقائمة الإنجازات التي حققتها مريم بنصالح؟ وهل سينجح في قيادة سفينة الباطرونا ويبرهن أنه ليس رجل سياسة فقط وإنما رجل اقتصاد كذلك؟
تعليقات (0)