علاش وكيفاش ...زيد ساعة / نقص ساعة
واخا دازت دابا تقريبا 6 سنين على اتخاذ الحكومة للقرار ديال زيادة الساعة مازال الأغلبية ديال المغاربة مامتقبلينش هاد الامر ومعتاربرينها بحال شي صاعقة كتنزل عليهم كل سنة.
وكاينين بزاف ديال المغاربة للي ماعارفينش أصلا لاش الحكومة كتزيد هاد الساعة، ولهاد السبب غادي نبسطو ليهم الأسباب اللي خلات الحكومة تتاخذ هاد القرار ديال اعتماد التوقيت الصيفي واللي يمكن نلخصوه فالرغبة ديالها فتقليص استهلاك الطاقة بالمغرب ب140 ميغاوات، واللي هي الحاجيات الاستهلاكية من الطاقة فساعة الذروة بالنسبة لأي مدينة متوسطة، وبهادا كنكونو خففنا العبء الاستثماري ديال الدولة فمجال الطاقة، وكنكونو فنفس الوقت ساهمنا فالحفاظ على البيئة ماللي مكنستهلكوش بزاف ديال الطاقة.
هادشي من جهة، ولكن كاين سبب آخر اللي كيخلينا فالمغرب نزيدو الساعة وهو مرتبط بتسهيل الإجراءات التجارية مع الشركاء ديال المغرب، وهنا بالخصوص كنهضرو على الاتحاد الأوروبي حيث كيولي عندنا نفس الفارق الزمني مع الشركاء الاقتصاديين لاسيما فقطاع ''الأوفشورينغ''، ومن هاد الاعتبارات كتولي إضافة 60دقيقة للتوقيت المغربي بمتابة محفز كيعمل على تعزيز وتقوية تنافسية الاقتصاد الوطني.
ولكن هاد التعليلات والشروحات كاملة اللي قدمنا على الفوائد الاقتصادية إن صح التعبير لهاد الزيادة ديال الساعة راها مكاتمنعناش باش نذكرو العيوب ديالها وتأثيراتها السلبية على المواطنين اللي كيلقاو راسهم ولمدة 5 أشهر تقريبا من كل سنة مجبرين على أنهم يدخلو فدوامة ديال تغيير مجموعة من الأنشطة اليومية فحياتهم وأن يحسوا بأن ساعات يومهم أطول من ساعات الليل، وكيكونو مجبرين على تغيير عاداتهم فالأكل والنوم، وهادشي بلا مانهضرو على المعاناة ديالا لأباء مع أبنائهم المتمدرسين اللي كيولي إيقاظهم فالصباح بحال "المهمة المستحيلة" لأن ساعتهم البيولوجية مكاتتأقلمش مع هاد التغيير.
دابا حنا عارفين باللي الأغلبية ديال المغاربة ماباغينش هاد الساعة الإضافية اللي ولات كتعيشهم فالجحيم وفنفس الوقت حنا عارفين بأنهو بالنظر للفوائد ديالها على الاقتصاد الحفاظ على الطاقة مانقدروش نستغناو عليها، ولكن السؤال المطروح واش ماكاينش شي حل باش نضربو العصفرين معا بحجر واحد بمعنى نستافدو من الحفاظ على الطاقة والمنافع ديالها الاقتصادية ومانضروش المواطنين فحياتهم العادية؟ و واش مانقدروش مثلا أننا نطبقو هاد الزيادة ديال الساعة غير على الإدارات اللي عندها ارتباط بالدول الأوروبية وعندها معاها مصالح مشتركة فقط ؟ تم واش مكاينش من حل آخر لتوفير الطاقة والحفاظ عليها من غير هاد الزيادة ديال الساعة، وبطبيعة الحال مع العلم أن بلدان كثيرة استغنات عليها ومن بينها مثلا الصين فسنة 1992 وروسيا ف 2011 وأوكرانيا 2011 وغيرها كثير من البلدان..وهاد الاستغناء على الساعة فهاد الدول واش مكيخليناش نطرحو السؤال مثلا علاش اتاخذت هاد القرار رغم أن فيه منافع كثيرة ليها؟ وبصريح العبارة واش حنا أحسن من هاد الدول كاملة اللي استغنات على هاد الساعة الإضافية لحقاش تبين ليها ان مضارها أكثر من منافعها؟