علاش وكيفاش... ماوراء قرار محكمة العدل الأوروبية بشأن اتفاقية الصيد البحري

الأربعاء 28 فبراير 2018 - 21:35

كثر الحديث من بداية هاد الأسبوع على القرار اللي صدراتو محكمة العدل الدولية بخصوص اتفاقية الصيد البحري اللي كتجمع مابين الاتحاد الأوروبي والمغرب، واللي جا فيه أن هاد الاتفاقية مابين الطرفين مكاتشملش مياه الأقاليم الجنوبية على اعتبار أن الاتفاق اللي تم إبرامو فسنة 2006 مكايتضمنش المياه المحاذية للمنطقة اللي متنازع عليها من الصحراء المغربية.

وعللت المحكمة هاد القرار بأن إدخال أراضي الصحراء فالدائرة ديال تطبيق اتفاقية الصيد البحري كتخالف مجموعة من قواعد القانون الدولي العام.

ومباشرة بعد هاد القرار اللي كان عندو وقع سلبي على مجموعة من المسؤولين المغاربة، خرج ناصر بوريطة، وزير الشؤون الخارجية المغربية والتعاون الدولي وفيديريكا موغيريني، الممثلة السامية للاتحاد الأوروبي المكلفة بالشؤون الخارجية وسياسة الأمن نائبة رئيس المفوضية الأوروبية، بتصريح مشترك أكدوا من خلالو أن المغرب والاتحاد الأوروبي غادي يبقاو حريصين على الحفاظ على التعاون ديالهم فمجال الصيد البحري، وعبروا على إرادتهم التفاوض على الآليات الأساسية والضرورية المرتبطة بالشراكة فهاد المجال.

ومن جهة أخرى، خرج الوزير عزيز أخنوش باش يوضح للناس اللي فهمو بأن هاد القرار غادي يعطي للبوليساريو مكانة فالموضوع بأن هادشي مكاينش، لحقاش القانون فحد ذاتو مكايعتارضش على قدرة المغرب على التفاوض على اتفاقية الصيد البحري اللي كتتضمن حتا المناطق الجنوبية، وزاد أكد أن الاتفاقية مامحدداش بشكل كافي باش تدخل فيها المناطق الجنوبية.

وفخضم هاد الجدل اللي خلقو القرار، كيظهر بشكل واضح أن التعامل السياسي والأمني والتجاري للمغرب مع الاتحاد الأوروبي واللجنة الأوروبية فيه شي خلل، وتيبان أن الاتحاد الأوروبي وبالرغم الاتفاقيات اللي كتجمعو بالمغرب فهو فمواقفو ضد مصالح المغرب.

وهاد الأمر عبر عليه عدد من المحللين الاقتصاديين اللي شافو بأن هاد القرار السيادي الأوروبي كيطرح للنقاش نقطة مهمة وهي التراجع السياسي المغربي فأوروبا وفي المقابل ديالو كنلقاو التفوق ديال اللوبي الجزائري، والكل عارف باللي الجارة مكاتفلتش أي مناسبة من هاد النوع باش تخلي المغرب يبان فموقف حرج سواء على المستوى السياسي أوالأمني أو الاقتصادي.

المهم هو أنه ماللي وصلنا لعمق المشكل وعرفنا التبعات ديال هاد القرار فمن المنطقي أن المغرب يلقا الوسائل اللي تمكنو من أنه يضغط على الاتحاد الأوروبي ويلعب الأوراق القوية ديالو لأن هاد الأمر متعارف عليه..

ومن هنا كنفتحو نافذة للنقاش حول الأمور اللي ممكن أن المغرب يلعب بيها كورقة ضغط لصالحو؟ ونتساءلو على مكامن الخلل اللي خلات محكمة العدل تتاخد هاد القرار؟ ونقولو بصريح العبارة فين كاين الخلل ونعريو عليه بكل جرأة ومصداقية ؟؟؟