حين كشفت فاجعة بوقنادل معدن المغاربة..

الخميس 18 أكتوبر 2018 - 18:15

شكلت فاجعة "قطار بوقنادل" امتحان كبير لإنسانية المغاربة كاملين اللي كل واحد منهم حاول يقدم ماوسعو من مساعدة ولو بسيطة للضحايا، بحيث أنهم مباشرة من بعد وقوع الحادث سارعوا باش يساعدوا الناس وينتشلوا الجثث، وحاولوا يقدموا الإسعافات الأولية للمصابين قبل ما يوصلوا رجال الوقاية المدنية أو السلطات باش يقوموا بالمهام ديالهم، وهنا كلنا خاصنا نوقفوا لهاد السلوك الإنساني الكبير اللي قاموا بيه هاد المغاربة، ونوهوا بهاد روح التضامن والتآزر اللي برهنوا عليها من خلال أفعالهم.

وفالوقت ذاتو ومن بعد ماتنقلوا المصابين للمستشفى العسكري لتلقي العلاجات كانت مجموعة أخرى بصدد التحضير لبادرة إنسانية أخرى وهي التبرع بالدم، واللي شاركوا فيها الآلاف من المواطنين باش يعبروا على تضامنهم ومساندتهم للضحايا.

وكل مغربي حاول من جيهتو باش يقدم أي نوع من المساعدة فمثلا الناس اللي كيتنقلو يوميا مابين الرباط والقنيطرة أو المناطق التي تيمر منها القطار قاموا بإطلاق مبادرات لنقل الأشخاص اللي كيديرو فحالهم "لانافيت"، وكاين من المشاهير فحال الفائز بلقب ماستر شاف "سيمو" اللي قدم من خلال الاختصاص ديالو بتقديم 200 وجبة للضحايا بالمستشفى.

وفالمقابل ديال هادشي كامل، لقينا شي سلوكات لا إنسانية اللي كتعبر على الجشع واللامبالاة ديال بزاف ديال الناس اللي ممكن نسميوهم اشباه المغاربة ومنهم بعض سائقي الطاكسيات والخطافة اللي استغلوا معاناة الناس باش يزيدو فثمن التذكرة، وزيد عليهم اللصوص اللي بداو تيسرقو فالأمتعة ديال الناس فوقت حدوث الفاجعة ويتمشاوا وسط الجثث ويقلبو فجيابهم بلا رحمة ولا شفقة. ونزيدو على هادو شي مسؤولين وبعض العناصر ففرق الإنقاذ اللي التاقطاتهم كاميرات الصحافيين وهوما مفرشخين ضحك، واللي نبغيو نسولوهم واش نتوما معروضين لحفلة تنكرية أولا هادوك الجثث اللي كتتمشاو بيناتها راها ماشي ديال بشر حقيقيين يمكن ولا غير لقطة من فيلم؟؟

ومع هادشي كامل شفنا كيفاش بزاف الفنانين والمشاهير اللي ماتزيكلو حتا مناسبة باش يبانو ضاربين الطم، وكأن هادشي وقع فشي كوكب آخر وهوما مامعنييش به من اي جهة.

ومن خلال المقاربة مابين السلوكات الإنسانية واللاإنسانية اللي بين عليها كل طرف، كنبقاو حايرين نلقاو تفسير ونتساءلوا علاش هادوك دارو كل ماكان فوسعهم باش يعاونو وعلاش الفئة الثانية دارت كل ما فوسعها باش ماتبانش فالصورة.

الميساج اللي نبغيو نوصلوه والعبرة اللي خدينا من هاد "الفاجعة" أن قيم الإنسانية كاينة بشكل كبير فالناس البسطاء اللي تيحسوا بمعاناة خوتهم، وأن بزاف ديال المشاهير مهووسين غير باش يبانوا ويتصوروا، وماللي يكون شي موقف إنساني عميق فين خاصهم بالفعل يعبروا على التضامن ديالهم تلقاهم مكاينيش هنا..إيوا باراكا من التصاور على ظهر الشعب راه عقنا بيكم.

اليوم المغاربة بينوا أنهم شعب على قدر كبير من الوعي، وأنه يتجاوب مع كل ماهو إنساني كوني وبحال هاد السلوك الراقي اللي بانت تجلياتو من خلال هاد الحادث راه خاصو يكون ديما حاضر، وكيفما بينا أننا متضامنين مع بعضنا واننا شعب متحضر، مانتسناوش حتا يتقلب شي تران "قطار" آخر ونبينو على الجانب الإنساني فينا، ولكن نبقاو دائما فكل سلوكاتنا تجاه الآخرين متشبتين بقيمنا الإنسانية والحضارية، لأنها الطريقة الوحيدة باش نعيشوا كاملين فأمان وسلم دائمين.